Arbaco, 10 June 2026 {HMC}. Hay’adda Sirdoonka iyo Nabad-sugidda Qaranka (NISA) ayaa sheegtay in howlgal gaar ah oo ka dhacay gobolka Shabeellaha Hoose lagu dilay sarkaal sare oo ka tirsanaa Al-Shabaab.
Qoraal ay hay’addu soo saartay ayaa lagu sheegay in howlgalka lagu fuliyay iskaashi ay la sameeyeen saaxiibbada caalamiga ah, iyadoo bartilmaameedka uu ahaa hoggaamiye sare oo ka tirsan kooxda.
NISA ayaa sheegtay in sarkaalkan uu hore uga badbaaday saddex howlgal oo kala duwan oo lagu beegsaday, balse ugu dambeyn lagu dilay howlgalka ugu dambeeyay.
Hay’addu ma shaacin magaca sarkaalkan la dilay, hase yeeshee waxay sheegtay in howlgalka uu qayb ka yahay dadaallada socda ee lagu burburinayo hoggaanka Al-Shabaab laguna wiiqayo dhaqdhaqaaqyadooda ka socda koonfurta Soomaaliya.
Ciidamada ammaanka Soomaaliya oo taageero ka helaya saaxiibbada caalamiga ah ayaa bilihii la soo dhaafay kordhiyay howlgallada milatari iyo kuwa sirdoon ee ka dhanka ah Al-Shabaab, kuwaas oo qayb ka ah qorshe lagu xoojinayo amniga laguna daciifinayo shabakadaha kooxda.
