Isniin 26 Oct 2026 {HMC} Wasiiro iyo saraakiil sare oo dhanka amniga ah oo ka kala socda Pakistan, Sacuudi Carabiya iyo Turkiga ayaa gaaray caasimadda Iiraan ee Tehran, halkaas oo ay kula yeelanayaan madaxda Iiraan wadahadallo ku saabsan xaaladda amniga gobolka iyo dadaallada lagu yareynayo xiisadaha u dhexeeya Washington iyo Tehran.
Wafdigan ayaa ka socda saddexda waddan ee saxiixay Heshiiska Difaaca Wadajirka ah ee Makka, waxaana xubnaha muhiimka ah ee booqashada ku jira ka mid ah Wasiirka Difaaca Sacuudi Carabiya, Khalid bin Salman Al Saud; Taliyaha Ciidamada Pakistan, Asim Munir; iyo Madaxa Sirdoonka Turkiga, Ibrahim Kalin.
Saraakiishan ayaa la kulmay Madaxweynaha Iiraan, Masoud Pezeshkian, iyagoo sidoo kale la filayo inay wadahadallo la yeeshaan mas’uuliyiin sare oo dhinaca amniga ah, xilli ay isa soo tarayaan walaacyada laga qabo in Maraykanku qaado weerarro cusub oo ka dhan ah Iiraan.
Booqashadan ayaa ku soo beegmaysa xilli ay socdaan dadaallo diblomaasiyadeed oo xooggan oo lagu doonayo in looga hortago in xiisadaha u dhexeeya Maraykanka iyo Iiraan ay mar kale isu beddelaan iska horimaad hubaysan.
Inkasta oo aan weli si rasmi ah loo shaacin faahfaahinta buuxda ee ajandaha kulamada, haddana booqashada wafdigan ayaa loo arkaa tallaabo muhiim ah oo lagu doonayo in la dejiyo xaaladda gobolka, isla markaana la abuuro fursado cusub oo wadahadal iyo is-afgarad ah.
Ali Vaez, oo ah ku-xigeenka agaasimaha Barnaamijka Bariga Dhexe iyo Waqooyiga Afrika ee hay’adda International Crisis Group, ayaa sheegay in booqashada degdegga ah ee wafdiga saddexdan waddan ay muujinayso dadaal lagu doonayo in Iiraan lagu dhiirrigeliyo tanaasul diblomaasiyadeed ka hor inta aysan dib u bilaaban iska horimaadyada hubaysan.
Wadahadalladan ayaa imanaya xilli mustaqbalka xiriirka Maraykanka iyo Iiraan uu weli mugdi ku jiro, iyadoo dalalka gobolka ay ka cabsi qabaan in dagaal cusub uu saameyn ballaaran ku yeesho amniga, xasilloonida iyo dhaqaalaha Bariga Dhexe.
