Sabti, 5, Sept 2026 {HMC} Dowladda Federaalka Soomaaliya iyo xubno ka tirsan mucaaradka ayaa maalmaha soo socda saxiixi kara heshiis lagu dhisayo Guddiga Hawlgalka Kala-guurka Dimuqraadiyadda (DTT), sida uu sheegay Maxamed Cabdirisaaq Maxamuud oo hoggaaminaya xubnaha Nabad iyo Nolol ku metelaya wada-hadallada siyaasadeed.
Qoraal uu ku soo qoray bartiisa X ayuu sheegay in dhinacyadu ay qarka u saaran yihiin inay soo gabagabeeyaan heshiiska, inkastoo uusan faahfaahin ka bixin qodobbada lagu heshiiyay, kuwa weli laga wada-hadlayo iyo taariikhda rasmiga ah ee saxiixa.
Guddiga la qorsheynayo ayaa la filayaa inuu qayb ka noqdo dadaallada lagu wajahayo kala-guurka dimuqraadiyadeed iyo arrimaha doorashooyinka Soomaaliya. Weli si rasmi ah looma shaacin xubnaha guddiga, awoodihiisa iyo muddada uu shaqeyn doono.
Horumarkan ayaa ku soo beegmaya xilli ay jiraan khilaafaad siyaasadeed iyo walaac la xiriira xaaladda amniga dalka. Maxamed Cabdirisaaq ayaa ku baaqay in la joojiyo rabshadaha, lana ilaaliyo geeddi-socodka siyaasadeed si heshiiska la filayo uu u yeesho macne iyo kalsooni.
Waxa uu hadalkan sheegay kaddib weerarkii lagu qaaday hoyga Jeneraal Mahad Cabdiraxmaan “Shub” ee degmada Doolow, kaas oo la sheegay inay ku dhaawacmeen shan qof oo rayid ah.
Wuxuu su’aal ka keenay in weerarkaasi ahaa isku day lagu carqaladeynayo wada-hadallada iyo heshiiska soo socda, wallow ay dowladda beenisay in ay iyada fulisay weerarka.
“Khilaafaadka siyaasadeed laguma xallin karo gantaallo, diyaarado aan duuliye lahayn iyo awood ciidan. Haddii heshiiska DTT uu yeelanayo wax macne ah, rabshaduhu waa inay joogsadaan, geeddi-socodka siyaasadeedna waa in la ilaaliyaa,” ayuu yiri Maxamed Cabdirisaaq.
Dowladda Federaalka Soomaaliya weli si rasmi ah ugama hadlin waqtiga la saxiixayo heshiiska, qaab-dhismeedka guddiga iyo hadallada la xiriirinaya weerarka Doolow iyo wada-hadallada siyaasadeed.
