Axad, 19 Luulyo 2026 {HMC}Â Madaxweynaha Suuriya Axmed Al-Sharaa ayaa dib-u-habayn ballaaran ku sameeyay hoggaanka hay’adaha amniga iyo sirdoonka dalka, isagoo ballaariyay awoodaha Wasiirka Arrimaha Gudaha isla markaana magacaabay taliye cusub oo sirdoonka ah. Tallaabadan ayaa qayb ka ah isbeddello waaweyn oo lagu samaynayo hay’adaha amniga ee dowladda.
Isbeddellada lagu dhawaaqay Axaddii ayaa lagu magacaabay Wasiirka Arrimaha Gudaha Anas Khattab inuu sidoo kale noqdo Madaxa Xafiiska Amniga Qaranka, oo ah hay’adda kormeerta dhammaan laamaha amniga ee Suuriya, isagoo isla markaana sii haysanaya xilkiisii Wasiirka Arrimaha Gudaha. Wakaaladda wararka dowladda ee SANA ayaa baahisay warkan.
Sidoo kale:
Hussein Al-Salamah ayaa loo magacaabay ku-xigeenka Madaxa Xafiiska Amniga Qaranka.
Mulham Al-Shantout ayaa noqday Kaaliyaha Wasiirka Arrimaha Gudaha ee Arrimaha Amniga.
Cabdul Qaadir Tahan ayaa loo magacaabay Agaasimaha Hay’adda Sirdoonka Guud.
Mas’uuliyiinta Suuriya ayaa sheegay in dib-u-habayntan looga golleeyahay xoojinta amniga qaranka, adkaynta xasilloonida, iyo ka saarista caqabadaha hortaagan dib-u-dhiska dalka.
Hay’adda Sirdoonka Guud ayaa mas’uul ka ah ururinta xogaha sirdoonka, diyaarinta qiimeynta khataraha gudaha iyo dibadda, iyo la-dagaallanka basaasnimada iyo argagixisada.
Agaasimaha cusub ee hay’addan ayaa hadda si sharci ah uga hoos shaqayn doona Wasiirka Arrimaha Gudaha Anas Khattab, taasoo ka dhigaysa in maamulka dhammaan hay’adaha amniga Suuriya uu si weyn ugu ururo gacantiisa, isagoo noqday mid ka mid ah mas’uuliyiinta ugu awoodda badan dowladda Madaxweyne Al-Sharaa.
Cumar Ozkizilcik, oo ah cilmi-baare sare oo ka tirsan Mashruuca Suuriya ee Atlantic Council, ayaa u sheegay Al Jazeera in isbeddelladani ay muujinayaan dadaal lagu sharciyeynayo qaab-dhismeedkii awoodda ee jiray xilligii maamulka Al-Sharaa ee gobolka Idlib. Wuxuu xusay in xilligaas Anas Khattab uu maamuli jiray sirdoonka iyo booliiska, hawlahaas oo markii dambe ay qayb ahaan wadaageen Hussein Al-Salamah.
Dowladda ku-meel-gaarka ah ee Suuriya, oo uu hoggaamiyo Al-Sharaa, ayaa la dhisay bil kadib markii madaxweynihii hore Bashaar Al-Assad uu u baxsaday dalka Ruushka bishii Diseembar 2024, taasoo soo afjartay tobannaan sano oo ay talada hayeen qoyska Assad.
Maamulka Al-Sharaa wuxuu isku dayay inuu isu muujiyo dowlad mideyn iyo dib-u-habayn doon ah, isagoo ku hawlan sidii dhammaan hay’adaha amniga ee kala qaybsanaa loogu hoos keeni lahaa maamul dhexe.
Dib-u-habayntan ayaa timid kadib toddobaadyo ay hay’adaha amniga Suuriya la kulmeen dhacdooyin amni oo culus. Qarax ka dhacay meel u dhow xarunta weyn ee garsoorka magaalada Dimishiq 2-dii Luulyo ayaa lagu dilay ugu yaraan 10 qof, kadib markii uu qarax ka dhacay maqaaxi.
Shan maalmood kadib, hal qof ayaa dhintay, halka 36 kalena ay dhaawacmeen markii walxaha qarxa oo lagu qariyay qashin-qub iyo gaari la dhigay ay ku qarxeen caasimadda, xilli Madaxweynaha Faransiiska Emmanuel Macron uu kula kulmay Madaxweyne Al-Sharaa qasriga madaxtooyada.
Mas’uuliyiinta Suuriya ayaa sheegay inay qabteen xubno ka tirsan unug xiriir la leh kooxda ISIL, kuwaas oo lagu eedeeyay labada weerar, iyagoo tuhmanayaasha ku raadraacay muuqaallada kaamirooyinka amniga.
Horaantii bishan, saraakiisha kastamyada ee xadka Ciraaq ayaa qabtay shixnad ay ku jireen gantaallo, madaafiic iyo diyaarado aan duuliye lahayn (drones), kuwaas oo lagu qariyay gaari shidaal sida. Waxay sheegeen in shixnaddaasi loo waday ururka Hezbollah ee Lubnaan, oo ay Iran taageerto. Hezbollah ayaa beenisay eedeynta.
Intii uu booqashada ku joogay Suuriya, Madaxweyne Macron—oo noqday hoggaamiyihii ugu horreeyay ee reer Galbeed ah ee booqda dalka tan iyo markii Al-Sharaa uu la wareegay maamulka Dimishiq—ayaa dib u soo celiyay xiriirka diblomaasiyadeed ee buuxa ee Faransiiska iyo Suuriya.
Maalmo kadib, shirkii NATO ee lagu qabtay Turkiga, Madaxweynaha Mareykanka Donald Trump ayaa la kulmay Madaxweyne Al-Sharaa, waxaana Washington ay ku dhawaaqday inay Suuriya ka saarayso liiska dalalka ay u aqoonsan tahay kuwa taageera argagixisada.
Xigasho: Al Jazeera.
