Jimce, 17 Luulyo 2026 (HMC) – Kooxaha gurmadka ayaa si degdeg ah u baadi-goobaya tobannaan qof oo lagu la’yahay magaalada Chongqing ee koonfur-galbeed Shiinaha, kadib markii dhul-go’ weyn uu aasay guryo ku yaallay deegaanka, sida ay sheegeen mas’uuliyiinta Shiinaha.
Dhul-go’a ayaa dhacay abbaaro 9:10 subaxnimo waqtiga maxalliga ah (01:10 GMT) maalintii Jimcaha, degmada Pengshui ee Chongqing. Waxaa ku dhintay 8 qof, halka 34 qof weli la la’yahay, in ka badan 1,100 qofna ay guryahooda ka barakaceen, sida ay baahisay warbaahinta dowladda.
Muuqaallo uu baahiyay telefishinka dowladda ee CCTV ayaa muujinayay buur weyn oo dhagxaan iyo carro ah oo qarisay qayb ka mid ah waddo ay ku yaalleen guryo iyo goobo ganacsi oo ku taalla salka buurta.
Hay’adda wararka dowladda ee Xinhua ayaa sheegtay in 10 qof laga soo badbaadiyay burburka, kuwaas oo ay ku jiraan laba qof oo qaba dhaawacyo culus.
Si looga hortago khataro dheeraad ah, waxaa la jaray adeegyada biyaha, korontada iyo gaaska gudaha hal kiiloomitir oo ku wareegsan goobta uu dhul-go’u ka dhacay. Sidoo kale, in ka badan 800 oo shaqaale gurmad ah ayaa loo diray goobta.
Mas’uuliyiintu waxay sheegeen inay u direen Chongqing in ka badan 8,000 oo agab gargaar ah, kuwaas oo ay ka mid yihiin teendhooyin, sariiro laablaaban iyo qalab degdeg ah oo loogu talagalay qoysaska.
Degmada Pengshui waxay ku taallaa koonfur-bari ee Chongqing, waxayna xuduud la leedahay gobollada Hubei iyo Guizhou.
Mas’uul maxalli ah ayaa sheegay shir jaraa’id in deegaanka uu ka dhacay dhul-go’u uu caan ku yahay dhul buuraley ah oo aad u jiir badan isla markaana aan la saadaalin karin. Waxa uu intaa ku daray in weli ay jiraan dhagxaan halis ah oo ku dheggan hareeraha buurta.
Dowladda Shiinaha ayaa u qoondeysay 50 milyan oo yuan (qiyaastii 7.36 milyan oo doolar) oo loogu talagalay howlaha samatabbixinta, gargaarka degdegga ah iyo taageeridda dadka ay masiibadu saameysay, sida ay sheegeen Wasaaradda Maaliyadda iyo Wasaaradda Maareynta Gurmadka Degdegga ah.
Madaxweynaha Shiinaha, Xi Jinping, ayaa ku amray mas’uuliyiinta inay si cilmi ku dhisan u abaabulaan howlaha baadi-goobka iyo samatabbixinta, isla markaana si degdeg ah loo baaro sababta keentay masiibadan, sida ay baahisay wakaaladda wararka ee Xinhua.
Horaantii bishan, Shiinaha waxaa ka dhacay dhul-go’ kale oo ka dhacay gobolka buuraleyda ah ee Gansu, kaas oo sababay dhimashada 21 qof.
