Talaado 20 Oct 2026 {HMC} Wasiirka Amniga Gudaha XFS, Cabdullaahi Sheekh Ismaaciil (Fartaag), ayaa kormeeray Garoonka Diyaaradaha Caalamiga ah ee Aadan Cadde, isagoo guddoomiyay shirkii shanaad ee lagu xoojinayay amniga iyo wada-shaqeynta hay’adaha ka hawlgala garoonka.
Shirka waxaa diiradda lagu saaray isku-duwidda hawlaha hay’adaha, hagaajinta adeegyada iyo dardargelinta qorshaha banneynta xarumaha ku dhow garoonka ee la qorsheeyay in la raro ama la dumiyo.
Wasiir Fartaag ayaa ku adkeeyay hay’adaha muhiimadda ay leedahay sugidda amniga garoonka, badqabka rakaabka iyo tayeynta adeegyada, isagoo xusay in Garoonka Aadan Cadde yahay wejiga Soomaaliya iyo marin muhiim u ah dalka.
Kormeerka waxaa Wasiirka ku weheliyay Wasiiru Dowlaha Wasaaradda Gaadiidka iyo Duulista Hawada XFS iyo mas’uuliyiin kale.
