Khamiis 20, Feb 2025 {HMC} NEW YORK — Saraakiisha ugu sareysa Qaramada Midoobay ee Afrika ayaa ka digay in weerarka fallaagada ay Rwanda taageerto ee bariga Congo, uu khatar ku yahay nabadda guud ahaan gobolka.
Hadalkan ayay saraakiishu ka sheegeen, shir deg deg ahaa oo ay Arbacadi shalay arrintani ka yeesheen xubnaha Golaha Ammaanka ee Qaramada Midoobay.
Bintou Keita oo ah ergeyga gaarka ah ee Qaramada Midoobay u qaabilsan Congo ayaa sheegtay, “in ay lagama maarmaan tahay in Golaha Ammaanku qaado tillaabooyin degdeg ah oo go’aan qaadasho ah si loo baajiyo dagaal ballaaran oo ka dhaca mandiqadda.
Huang Xia, ergeyga gaarka ah ee Qaramada Midoobay u qaabilsan gobolka harooyinka waaweyn ee Afrika, oo ay ku jiraan Congo, Burundi, Rwanda iyo Uganda ayaa isna sheegay, in qabsashada magaalooyinka waaweyn ee bariga Kongo ee fallaagada M23 toddobaadyadii la soo dhaafay iyo bayaannada dhinacyada muhiimka ah ay muujinayaan, in khatarta colaadda ka holceysa gobolka ay maanta aad uga halisantahay sidii hore.
Safiirka Faransiiska ee Qaramada Midoobay Nicolas De Riviere ayaa isna ku booriyay Golaha in ay si deg deg ah uu u ansixiyo qaraar qabyo ah oo uu dalkiisu faafiyay laba toddobaad ka hor, kaas oo dib u xaqiijinaya taageerada madaxbanaanida dhuleed ee Kongo.
Safiirka ayaa ku baaqay in la joojiyo weerarka fallaagada M23 iyo in ay Rwanda ciidankeeda kala baxdo Congo, iyo in si deg deg ah loo billaabo wadahadallada nabadda.
