Arbaco, 29,Jan- 2025 (HMC) – Dowladda Soomaaliya oo maanka ku haysa in mar kale suurtagal ay noqon karto in Madaxweynaha Mareykanka Donald Trump uu ciidamadiisa kala bixi karo Soomaaliya ayaa kireysatay shirkad fadhigeedu yahay Washington DC oo xiriir la leh madaxweyneTrump si looga hortago in Trump uu mar kale ciidamada Maraykanka ka soo saaro Soomaaliya.
Safiirka Soomaaliya ee Washington Dahir Xasan Carab ayaa heshiis hal sano ah oo dhan $600,000 la saxiixday shirkadda BGR Group, oo ah shirkad ay aasaaseen saraakiil iyo qareenno Jamhuuriyin ah, heshiiskaan oo dhacay Dhamaadkii bishii November ee sannadkii hore.
Madaxweynaha dalka Mareykanka Donald Trump ayaa dhammaadka muddadii hore ee xilka Aqalka Cad uu hayay wuxuu ciidamada Mareykanka kala baxay Soomaaliya, laakiin waxaa ciidamadaasi dib ugu celiyay Soomaaliya madaxweynihii ku xigay ee Joe Biden.
Dowladda Soomaaliya ayaa haatan raadinaysa in iyadoo isticmaalaysa shirkaddan ay kireysatay ee BGR uu Maraykanku sii wado taageerada milatari ee Soomaaliya uu siiyo, iyadoo aaminsan in taageeradaasi ay laf dhabar u tahay dagaalka ay kula jirto kooxaha argagixisada ah ee ka howlgalla Soomaaliya.
Shirkadda BGR Group ayaa waxaa aas-aasayaasheeda ka mid ah barasaabkii hore ee gobolka Mississippi Haley Barbour, oo Jamhuuri ah, Waxaa sidoo kale xubnaheeda ku jira Tom Locke, oo horey usoo noqday ku-xigeenka kaaliyaha agaasimaha FBI-da.
