Arbaco, 29,Jan- 2025 (HMC) Dibadbax rabshado watay oo ka dhacay Magaalada Kinshasa ee Caasimadda Jamhuuriyadda Dimuqraadiga Kongo ayaa lagu beegsaday Safaaradaha Dalalka Faransiiska, Ruwaanda, Biljamka iyo Maraykanka oo lagu eedeeya in ay garabsiinayaan Jabhadda hubeysan ee M23.
Dadka dibadbaxayay waxa ay gubeen Calamada Dalalkaas qaarkood, halka ay taayiro ku hor shideen dhismaha safaaraddahaas ee Magaalada Kinshasa si ay u muujiyaan carada ay ka qabaan garab istaaggooda Fallaagada M23 ee hubeysan.
Dhaqdhaqaaq colaadeed ayaa ka dhex billowday Dalalka Jamhuuriyadda DImuqraadiga Kongo iyo Ruwanda, xiisadda meesha ay joogto ayaa laga cabsi qabaa in ay kor uga sii kacdo maadaama Kigali ay xoogga saartay taageerradeeda M23.
Dhinaca Kale, dagaal culus ayaa ka dhacay Magaalada Goma oo dhexmaray ciidamada Dowladda Jamhuuriyadda Dimuqraadiga Kongo oo rogaalcelis ah iyo fallaalada todobaadkaan gacanta ku dhigtay Magaaladaan muhiimka ah.
Maydadka dadka ku dhintay dagaalkii shalay ka dhacay Magaalada Goma ayaa daadsan waddooyinka halka goobaha caafimaadka ay la dhibaatoonayan daryeelka bukaannada kusoo dhaawacmay dagaalladaas sida ay wararku sheegayaan.
