Jimco 24, Jan 2025 {HMC} Kabul — Dawladda Taliban ee Afghanistan ayaa Jimcaha maanta sheegtay in amar soo qabasho ah oo ay Maxkamadda Caalamiga ah ee Dambiyada (ICC) ku doonayso hoggaamiyayaasheeda uu yahay “mid ujeeddooyin siyaasadeed leh”.
Warkan ayaa yimid maalin kadib markii dacwad-oogaha guud ee ICC uu shaaciyay inuu doonayo amarro soo qabasho ah oo ka dhan ah hoggaamiyayaasha sare ee Taalibaan ee Afghanistan, kuwaas oo lagu eedaynayo inay geysteen tacaddiyo ka dhan ah haweenka – oo ah fal-dambiyeed ka dhan ah bani’aadanimada.
“Sidii go’aanno badan oo kale oo ka soo baxay (ICC), waxa ka maqan sal-dhig sharci oo caddaalad ku dhisan, waa arrin laba-wajiilenimo leh, ujeeddooyin siyaasadeedna laga leeyahay,” ayaa lagu yiri bayaan ka soo baxay Wasaaradda Arrimaha Dibadda oo lagu baahiyay barta X ee baraha bulshada.
“Waxaa nasiib-darro ah in hay’addani ay indhaha ka laabatay dambiyada dagaal iyo kuwa ka dhanka ah bani’aadanimada ee ay galeen ciidamada shisheeye iyo xulafadoodii gudaha intii lagu guda jiray labaatankii sano ee ay Afghanistan haysteen.”
Bayaanka ayaa lagu sheegay in maxkamaddu “aysan isku dayin inay dunida oo idil ku qasabto fasiraad gaar ah oo la xiriirta xuquuqda aadanaha, ayna hareer marto mabaadii’da diineed iyo kuwa qaran ee ay aaminsan yihiin shucuubta kale ee caalamka”.
Taalibaan ayaa dib ula wareegtay awoodda sannadkii 2021-kii kaddib markii ay xukunka ka tuurtay dawladdii ay Maraykanku taageerayeen, iyagoo dadka ku soo rogay fasiraad adag oo ku aaddan shareecada Islaamka, si weynna u xaddiday dhammaan dhinacyada nolosha haweenka.
Wasiir ku xigeenka Arrimaha Gudaha ee Afghanistan, Maxammad Nabi Cumar, oo horay ugu xirnaa xabsiga Guantanamo Bay, ayaa yiri “ICC nama cabsi gelin karto”.
“Haddii ay kuwani ahaan lahaayeen maxkamado caddaalad ah oo dhab ah, waxay ahayd inay Maraykanka hor keenaan maxkamadda, maxaa yeelay Maraykanka ayaa sababay dagaallada, dhibaatooyinka adduunkana waxaa sababay Maraykanka,” ayuu ka sheegay munaasabad ka dhacday magaalada Khost ee bariga dalka, taasoo uu goob-joog ka ahaa weriye ka tirsan wakaaladda wararka ee AFP.
Wuxuu intaa ku daray in Ra’iisul Wasaaraha Israa’iil, Benjamin Netanyahu, isna ay tahay in la horkeeno maxkamadda, isagoo tixraacaya dagaalka uu dalkiisu ka wado Gaza, kaasi oo ka dhashay weerarradii Xamaas ay fulisay bishii October ee sannadkii 2023-kii.
ICC ayaa bishii November ee sannadkii tegay soo saartay amarro soo qabasho ah oo ka dhan ah Netanyahu, wasiirkiisii hore ee gaashaandhigga, iyo saddex hoggaamiye oo sar-sare oo ka tirsan Xamaas.
