Jimco, 24, Jan 2025 {HMC} Wararka naga soo gaaraya gobolka Bari ayaa sheegaya in Fu’aad Xanaano, oo ka mid ah saraakiisha ciidamada Puntland, uu ku dhaawacmay qarax miino oo ka dhacay deegaano ka tirsan buuraha Calmiskaad.
Sida aan xogta ka helnay ilo xog ogaal ah, Qaraxa ayaa haleelay sarkaalkan iyo askari kale oo la socday, waxaana la sheegay in Fu’aad Xanaano uu qaraxa ku waayay mid ka mid ah lugihiisa.
Ciidamada uu watay sarkaalkan ayaa howlgallo culus ka waday buuraha Calmiskaad, gaar ahaan aagga Tursumaale, halkaas oo ay saakay ciidamada Puntland dagaal kaga la wareegeen kooxda Daacish.
Wararka ayaa intaas ku daraya in kooxda Daacish ay miinooyin badan ku xireen dhulka laga saaray.
Dhinaca kale, shalay galikii dambe sarkaal lagu magacaabo Haruuse Bilcil ayaa ku geeriyooday qarax miino oo ay Daacish la eegatay. Sidoo kale askari katirsan ciidanka Puntland ayay kooxda Daacish ku dileen toogasho meel fog ah.
Daacish oo ay ku jiraan ajaanib badan ayaa isticmaalaya xeelad badan oo ay doonayaan inay ciidamada Puntland ku gaarsiiyaan khasaare xooggan. Dhowr jeer, ciidamada ayaa fashiliyay diyaarado qaraxyo ay kusoo xireen, inkastoo qaar kamid ah ay ciidamada kasoo gaareen dhimasho iyo dhaawac.
Puntland ayaa sheegtay inay kaligeed dagaalka kula jirto kooxda Daacish. Waxay beesha caalamka ka codsaday in laga taageero dagaalkan oo ay sheegeen inay kula jiraan argigixiso caalami ah.
