Jimco 24-jun 2025 {HMC} Wasaaradda Kalluumaysiga iyo Khayraadka Badda Dawladda Puntland oo kaashanaysa Wasaaradda Deegaanka, Jaamacadda Bariga Afrika, Jaamacadda Citycote iyo Machadka Culuumta Badda ee Puntland ayaa maanta booqday goobtii ay kusoo caaryeen kalluunka Homboborada (Dolphins) ee xeebta magaalada Boosaaso. Waxay halkaas kusoo arkeen tiro homboboro ah oo dhintay oo kor u dhaafaya boqol.
Waxaa halkaas tagey labo kooxood oo isugu jira khuburada cilmiga Badda iyo sayniska. Waxay samples kasoo qaadeen:
1: Sample dheecaan iyo hilib ah kallunkii dhintay
2: Waxay biyihii Badda ee aagga kalluunku kusoo caaryey kasoo qaaden sample.
3: Sidoo kale, waxay sample ka qaadeen ciiddii (Soil) kii xeebta ee agagaarka kalluunku kusoo caaryey.
Waxaa dhamaan samples-ka loo dirayaa baaritaan laboratory ah.
Ugu dambayn, waxaa khuburadu meesha ka saareen inaan noocyada noolaha kale ee badda oo mayd ah lagu arag xeebta.
Sababta dhabta ah, waxa nala wadaagi doona khuburada baaritaanka ka dib.
Mas’uuliyiinta goobta booqday waxay kala yihiin Wasiirka Kalluumaysiga iyo Khayraadka Badda Dawladda Puntland, Hon Abdirisak Abdulahi Xagaa, Wasiir Ku-xigeenka Wasaaradda Kalluumaysiga, Hon Mohamoud M. Ali Gabax, Ku-simaha Agaasimaha Guud ee Wasaaradda Kalluumaysiga Maxamed Siciid Black iyo masuuliyiin kale.
