Arbaco, 22,Jan,2025 (HMC) – Taliyaha Ciidanka Israa’iil Gen. Herzi Halevi ayaa ku dhawaaqay in uu xilka iska casilayo marka la gaaro Bisha Maarso sabab la xiriirta waji-gabaxii uu kala kulmay weerarkii Xamaas ay ku qaadday 7dii Oktoobar 2023 ee lagu qafaashay Maxaabiista badan.
Herzi Halevi ayaa guuldarro aan la aqbali Karin ku tilmaamay weerarkaas dhacay ee lagu dilay dad gaaraya 1,200 oo ruux inkasta oo ay jiraan warbixinno kordhinaya inta uu khasaaraha gaarsiisan yahay maadaama Israa’iil wax badan ay qarisay.
Taliyahaan ciidanka Difaaca Israa’iil hoggaamiya ayaa sidoo kale ku guuldareystay soo furashada Maxaabiista oo markii labaad lagu soo deynayo wadahadal, taasi waxa ay bannaanka soo dhigtay awoodda liidato ee Yuhuudda.
Isaga oo heysta amarka Ra’iisul Wasaare Netanyahu isla markaana hub culus oo casri ah helay Maraykanka iyo xulufada kale ayuu ku guuldareystay in uu ciidanka ku hoggaamiyo guul uu ku faani karo oo ah soo furashada Maxaabiista maqan.
Saraakiil, Wasiirro & mas’uuliyiin kale ayaa iska casilay xilalkii ay ka hayeen Israa’iil kolkii ay la kulmeen guuldarro xooggan oo uga timid hoggaamintooda howlgallada socda tan iyo bishii Oktoobar sanadkii 2023 balse hadda kusoo biya shubtay wadahadal.
