Arbaco 15, Jan 2025 {HMC} Dowladaha Soomaaliya iyo Sucuudiga ayaa kala saxiixday Mashaariic Horumarineed oo uu Sacuudigu maalgalinayo, mashruucaan dhinaca Soomaaliya waxaa u saxiixay Wasiirka Wasaaradda Maaliyadda Biixi Imaan Cige halka Dowladda Sacuudiga uu u saxiixay Maamulaha guud ee Sanduuqa Horumarinta Dhaqaalaha Saudi Arabia Suldaan Abdulrahman Al-Marshad kadib kulan muhiim ah oo ka dhacay Xarunta Wasaardda Maaliyadda Soomaaliya.
Maamulaha guud ee Sanduuqa Horumarinta Dhaqaalaha Saudi Arabia Suldaan Abdulrahman Al-Marshad iyo masuuliyiin ka socotay Dowladda Saudi Arabia ayaa shalay soo gaaray magaalada Muqdisho kuwaasi oo doonayo inay indha indheeyaan meelaha Soomaaliya laga maalgelin karo oo fursadaha banaan.
Wasiirka Maaliyadda Soomaaliya Biixi Imaan iyo Maamulaha guud ee Sanduuqa Horumarinta Dhaqaalaha Saudi Arabia Suldaan Abdulrahman Al-Marshad waxa ay diirada ku saareen kulankoodi hannaanka dib-u-habeynta Maaliyadda Soomaaliya oo haatan meel wanaagsan maraya iyo sidii loo maalgalin lahaa mashaariicda muhiimka ah ee ay si gaar ah Dowladda Soomaaliya mudnaan u siinayso.
Intii uu socday shirka, Wasiirka Maaliyadda ayaa xaqiijiyay sida ay Dowladda Soomaaliya uga go’an tahay abuuridda fursado dhaqaale oo lagu maalgalinayo bulshada Soomaaliyeed, si sare loogu qaado dhaqaalaha dalka iyo wax-soosaarka.
Kulankaan waxaa goob joog ka ahaa Wasiirka Wasaaradda Tamarta iyo Biyaha, madaxda Bangiga Horumarinta iyo dib-u-dhiska Soomaaliya, Safiirada laba Dal ee Soomaaliya iyo Saudi Arabia ayaa waxaa lagu saxiixay heshiis is afgrad ah oo Dowladda Sucuudigu ay ku maalgalinayo qodista Ceelal Biyoodyo iyo horumarinayo Reer Miiga.
Si kastaba arrimahaani oo dhami waxa ay yihiin kuwa la jaan qaadaya Talaabooyinka horumarineed ee lagu maalgalinayo ilaha dhaqaalaha Dalka oo natiijo ka dhalatay hannaankii deyn cafinta oo Dowladda Soomaaliya ay ku maamushay waddadii saxnayd ilaa laga gabagabeeyay.
