Talaado 14, Jan 2025 {HMC} Ciidamada difaaca maamulka Puntland ee buuraha gobolka Bari kawada howlgallo ka dhan ah kooxda Daacish, ayaa dab qabadsiiyay saldhigyo ay lahaayeen kooxdaasi , kaddib markii dagaal xooggan halkaasi looga saaray kooxda.
Taliska ciidamada Puntland ayaa sheegay in la gubay talisyadii argagixisadu ku lahayd buuraha Calmiskaad, halkaas oo kooxda ku laheyd saldhigyo ay gabaad ka dhigan jireen , sidoo kale mararka qaar ay kasoo qaadi jireen duullaan.
“Ciidanka hawlgalka ciribtirka argagixisada ayaa gubay talisyo argagixisada Daacish ku lahayd buuralayda Cal-miskaad,, waxaana wali sii socda baacsiga kooxdaasi ” ayaa lagu yiri warbixinta kooban ee ka soo baxday taliska ciidanka difaaca Puntland.
Saraakiisha hoggaamineysa howlgalka ka dhanka ah kooxda Daacish, ayaa sidoo kale sheegay in la go’doomiyay goobaha ay ku sugan yihiin kooxdaasi, waxa ayna sheegeen saraakiisha in ay ku hareereesan yihiin god talis weyn u ah kooxad Daacish.
Maamulka Puntland ayaa markan ku dhawaaqay dagaal ay kusoo afjarayaan kooxaha argagaxsisada ah ee ku sugan buuraha gobolka Bari, Madaxweynaha maamulkaasi ayaana bilo u jooga gobolka Bari hoggaaminta howlgalka ka dhanka ah kooxda Daacish.
