Khamiis 02, Jan 2025 {HMC} Kulan xasaasi ahaa oo goordhaw gudaha magaalada Baledweyne ku dhexmaray Waxgaradka beelaha Xawaadle iyo Abgaal oo ay hormuud ahayeen Ugaas Yuusuf Ugaas Xasan iyo Imaam Daahir Imaam Cumar ayaa is faham looga gaaray in la aaso meydadka askartii dhawaan lagu dilay deegaanka Ceel baraf ee gobolka Shabeellaha Dhexe.
Kulanka waxaa sidoo kale qeyb ka ahaa masuuliyiin ka tirsan dowladda Fedaraalka oo ay ka mid yihiin Wasiirka Batroolka iyo Macdanta Daahir Shire, qaar ka mid ah Xildhibaan Baarlamaanka Soomaaliya ku matala beesha Xawaadle iyo Taliyaha Hay’adda Nabadsugida iyo Sirdoonka Qaranka Cabdullaahi Sambaloolshe oo saakay soo gaaray Baledweyne.
Muxudiin Xasan Afrax oo ka mid ah Nabadoonada beesha Abgaal ee Baledweyne u yimid xal u helista xiisada ka dhalatay askartii lagu laayay Ceel baraf oo si kooban ula hadlay Warbaahinta ayaa xaqiijiyay in la isku afgartay aasida meydadka askartii la dilay.
“Kulan saakay aan la yeelanay Ugaaska Xawaadle, Waxgaradka iyo siyaasiyiinta waxaa isla garanay oo isku fahamnay inaan marka hore aasano meydadka, wixii kale oo jirana aan dib uga fariisano” ayuu yiri Nabadoon Muxidiin Xasan Afrax oo ka mid ah Nabadooda beesha Abgaal.
Isfahamka in meydadka askarta la aaso ayaa kusoo aadaya, iyadoo labadii maalmood ee lasoo dhaafay kulamo arintaan la xariira ay si xoog leh uga socdeen Magaalooyinka Baledweyne iyo Maxaas ee gobolka Hiiraan.
