Axad 29, Dec 2024 {HMC} Sida ay xaqiijiyeen ilo wareedyo amni oo si dhow ula socday howlgalka cusub Midowga Africa ee Soomaaliya, Itoobiya ayaa isku dayaysa in ay ku qanciso wadamada ciidanka ugu deeqay howlgalka cusub ee AUSSOM in ay qaadacaan howlgalka si culays amni loo saaro dowladda Faderaalka, caalamkana looga gado in Soomaaliya ku socoto wadadii Afganistan. Inkastoo aysan guulaysan wali isku daygaan dowladda ayaa baaraan degtay xilli hore.
Dowladda Faderaalka ayaa Eritrea iyo Masar ku wargalisay in ay heegan galiyaan ciidamo hadii loo baahdo buuxin kara saldhigyada ay baneeyeen.
Somalia ayaa kulamadii u dambeeyay ee beesha caalamka iyo AU ka sheegtay in ay hayso ciidamo ku filan amniga. Dowladda ayaa ku dooday in mudadii ATMIS ay jirtay aysan qaadin howlgalo amni sidoo kale dowladu qaaday howlgal lagu xoreeyay dhul iyada oo aysan la socon ciidanka Midowga Africa. Sidaas darteed aysan ka qabin wax wal wal ah dhaq dhaqaaqa Al shabaab.
Dowladda Itoobiya ayaa golaha amaanka ee Qaramada Midoobay ka codsatay in wadamada Soomaaliya ciidanka ugu deeqay loo ogolaado inay ka doodaan qaabku uu noqonayo howlgalka cusub ee Soomaaliya meeshana laga saaro wadamada kale sida Masar.
Itoobiya ayaa aad u buunbuunisay khatar Al shabaab waxayna sheegeen in ay xiriir la sameysteen ururo caalami ah aana looga maarmin howlgalka cusub ciidanka Itoobiya.
December 23, 2024, Soomaaliya waxay si kulul u cambaareysay ciidamada Itoobiya “Weerar bareer ah oo aan loo meel dayin” oo ay ku qaadeen fariisimo ay Ciidanka Xoogga Dalka Soomaaliyeed ku lahaayeen Doolow, kaasoo sababay khasaare dhimasho iyo dhaawac ah oo soo gaaray dad shacab ah.
Soomaaliya ayaa kulanka golaha amaanka ee QM ka sheegtay inaysan jirin Qatar ka imaan karta Al shabaab ayna wadamada Saaxiibadeed ah ka heleen ciidan gaaraya 11,000 oo la gayn doono meelaha ay ka baxaan ATMIS ka hor howlgalka cusub.
Warar soo baxaya ayaa sheegaya in Soomaaliya ay ka heshay 7,000 oo askari oo ka socda Uganda, iyadoo 5,000 oo kale loo kala qeybiyay Jabuuti iyo Rwanda, halka Masar loo arko inay tahay mid kayd u ah howlgalka AUSSOM.
Wafdigii DFS ee tagay Addis Ababa ayaa Itoobiya u balanqaaday 2,000 oo askari inay ku darsadaan howlgalka cusub iyadoo shuruudo adag lagu xiray — “waa in aan la dejin karin gobollada Gedo iyo Koonfur-galbeed, meelaha ay Itoobiya saamaynta ku leheed tan iyo 1990-aadkii” ayaa ka mid ah shuruudaha.
Soomaaliya ayaa sidoo kale ku adkeysaneysa in ay go’aan ka gaari doonto keenista ciidamadan, isla markaana Itoobiya ama cid kale ay bixin doonto qarashka ku baxaya ciidanka Itoobiya ee howlgalka ka qayb noqonaya.
