Jimco 27, Dec 2024 {HMC}Dowladda Mareykanka waaxdeeda Socdaalka ayaa soo masaafuriyay sarkaal sare oo hore uga tirsanaan jiray ciidamada Milatariga Soomaaliya, kaasi oo ay sheegeen in uu geystay jirdil, argagixin iyo xadgudubyo kale oo ka dhan ah xuquuqda aadanaha.
Sarkaalkan oo 71-jir ah oo lagu magacaabo Yuusuf Cabdi Cali oo loo yaqaanno “Tukeh” ayaa saraakiisha socdaalka ka soo saareen dalka Mareykanka Dec 20-keedii, waxa uu ahaa Gaashaanle Sare oo ka tirsan Ciidanka Xoogga Dalka Soomaaliyeed iyo Taliyaha Guutada Shanaad ee Waqooyi Galbeed Soomaaliya xiligii Madaxweyne Siyaad Barre 1987 ilaa 1989kii.
Isaga oo ah sarkaal sare oo ka tirsan ciidamada xoogga dalka Soomaaliyeed, waxaa la sheegay in Cali Tukeh uu ku kacay dhaqdhaqaaq argagixin ee ka dhanka ahaa xuquuqda dadka rayidka, Waxaa la rumeysan yahay inuu geystay xad-gudubyo dhowr ah oo ka dhan ah xuquuqda aadanaha, oo ay ka mid yihiin dil sharci darro ah, jirdil iyo xarig sharci darro ah sida ay dacwad ogaayasha Mareykanka usoo jeediyeen.
Sida lagu sheegay War ka soo baxay Hay’adda Socdaalka 23-kii December Ciidanka Xoogga Dalka Soomaaliyeed waxa ay sannadahaas ku kaceen xad-gudubyo badan oo ka dhan ah xuquuqul insaanka, oo ay ka mid yihiin dil toogasho ah oo lagu fuliyay dad lagu tuhmay in ay ka soo horjeedaan siyaasadda iyo burburinta kaydka biyaha si loo beegsado dadka rayidka ah.
Bishii Febraayo ee Sanadkan 2024, Garsooraha Waaxda Caddaaladda ee socdaalka wuxuu soo saaray go’aan ka kooban 65 bog oo go’aaminaya in Cali shakhsi ahaan uu galay jir dil intii uu hoggaanka u hayay Ciidanka Qaranka Soomaaliyeed.
Sida go’aanka lagu sheegay, Cali waxa uu ku amray askarta isaga ka amar qaata inay xiraan, jir dilaan oo ay gacan ka geystaan dilalka sharci darrada ah, ugu dambeyn Garsooraha ayaa amray in loo soo tarxiilo Soomaaliya.
Yuusuf Cabdi Cali oo loo yaqaanno “Tukeh” ahna sargaalka ay Mareykanka dalkooda ka soo masaafuriyeen ayaa maalin ka hor sidiiran loogu soo dhoweeyay magaaada Laascaanood ee Xarunta Gobolka Sool.
