Arbaco, 25, Dec 2024 {HMC} Wararka naga soo gaaraya deegaanka Dacawalay ee Maamulka Soomaalida ayaa sheegaya in halkaasi ay ku dagaalameen ciidamada Liyuu Booliis iyo dad rayid ah.
Dagaalka ayaa yimid ka dib markii Askar ka tirsan ciidamada Liyuu Booliis ay weerar ku qaadeen dad shacab ah oo ku sugnaa deegaanka Dacawaaley, xilli ay socdeen kulamo lagu xallinayo colaado ka taagna halkaasi.
Khasaare isugu jira dhimasho iyo dhaawac ayaa ka dhashay dagaalka, waxaana wararka ka sheegayaan in ciidamada Liyuu Booliis ay isaga baxeen. Lama oga weli khasaaraha rasmiga ah inta uu la egyahay.
Balse, War saxaafadeed ka soo baxay Wasaaradda Amniga Somaliland ayaa lagu sheegay in Ciidamada Liyuu Booliis ‘ay xasuuqeen dad shacab ah oo ku sugnaa deegaanka Dacawalay’.
“Ciidamada Liyuu Booliska ayaa Degaanka Dacawalay ka afduubay Madax-dhaqameed ka soo jeedda Somaliland, kuwaasoo halkaa u tegey ka shaqaynta Nabadda iyo daminta Colaadda halkaa ka dhacday maalmihii u danbeeyey, taasoo ah gef iyo xadgudub cad” ayaa lagu yiri qoraalka ka soo baxay Wasaaradda Amniga Somaliland.
Weli Maamulka Dowlad deegaanka kama hadlin eedaha loo jeedinayo ciidamada Liyuu Booliis ee la xiriira dilka dadka shacabka ah.
