24, Dec 2024 {HMC} Markab laga leeyahay dalka Ruushka oo ay Ukraine sheegtay in loo diray Suuriya si uu hub uga soo ururiyo ayaa ku degtay badda Mediterranean-ka, sida ay sheegeen saraakiil ku sugan magaalada Moscow.
Laba ka mid ah shaqaalihii markabka ayaa la la’yahay ka dib markii uu qarax ka dhacay qolka matoorka ee Ursa Major oo u dhexeeya Spain iyo Algeria, sida ay sheegtay wasaaradda arrimaha dibadda. 14 qof oo kale ayaa la badbaadiyay oo loo qaaday Spain.
Sirdoonka Milateriga Ukraine ayaa shalay sheegay in markabkan oo horey loogu yeeri jiray Sparta III loo diray dalka Suuriya si uu u soo saaro hub iyo qalab milateri kadib markii la riday Bashaar Al Assad.
Qoraal ay soo dhigtay Telegram, ayay hay’addu ku sheegtay in markabku uu ku jabay meel u dhow Portugal, balse shaqaaluhu ay awoodeen inay “xakameeyaan dhibaatada oo ay sii maraan marin-biyoodka Gibraltar”.
Waxay la wadaagtay sawirka Sparta III, in kasta oo markabka lagu sheegay bayaanka sida Sparta. Waxaa badda Mediterranean-ka ku sugan markab kale oo laga leeyahay dalka Ruushka oo lagu magacaabo Sparta, sidaas darteed si buuxda ma cadda markabka ay hay’addu ula jeeday.
Xogta la socodka maraakiibta ee Kooxda Sarrifka saamiyada London (LSEG) ayaa muujinaysa in Ursa Major uu ka dhoofay dekedda Ruushka ee St Petersburg 11kii Diseembar. Waxaa markii ugu dambeysay la arkay iyada oo direysa 10.04pm GMT Isniintii inta u dhexeysa Algeria iyo Spain.
Ruushka oo taageerayey nidaamkii laga tuuray talada Suuriya ee Bashar Al-Asad ayaa gudaha wadankaas waxaa wali ka yaalo hub farro badan oo u uku taageeray maamulka, iyadoo dhinaca kale aay jiraan warar sheegayo in wadahalo aay dhex-mareen Ruushka iyo Dowlada cusub ee Suuriya, xili Ruushka qudhiisa uu ka dhawaajiey in uu la shaqeeynayo maamulka cusub.
XIGASHO: Sky News
