Talaado 17,Dec,2024 {HMC} Madaxweynaha Jamhuuriyadda Federaalka Soomaaliya Xasan Sheekh Maxamuud ayaa kulan gaar ah Muqdisho kula qaatay Ergayga Shiinaha u qaabilsan Geeska Afrika Ninka lagu magacaabo Xue Bing oo caasimadda soo gaaray.
Madaxtooyada Soomaaliya ayaa faah-faahin hordhac ah ka bixisay safarka Ergaygaan & kulanka uu la qaatay Madaxweyne Xasan Sheekh Maxamuud, waxa ay sheegtay in diiradda la saaray ka faa’iideysiga fursadaha Maalgashiga, xoojinta xiriirka labada Dal iyo kuwo kale.
Madaxweyne Xasan bogaadiyay doorka Dowladda Shiinaha ay ka qaadaneyso dhinac istaagga Soomaaliya sida Amniga, Dhaqaalaha, Siyaasadda, Diblumaasiyadda, Ganacsiga iyo Waxbarashada si cagta loo saaro mustaqbal fog ee dalalkaan.
Xue ayaa dhankiisa sheegay in ugu horreyn uu ka mahadcelinayo soo dhaweynta loogu sameeyay Magaalada Muqdisho, waxa uu dhankiisa ballanqaaday in Dowladda uu wakiilka ka yahay ee Shiinaha ay horumar ku sameyn doonto waxyaabaha ay kawada hadleen Madaxweyne Xasan.
Soomaaliya & Shiinaha waxaa ka dhaxeeya xiriir kor u dhaafay 60 sano, Xukuumadda Beijing ayaa safka hore kasoo gashay Dalalka Dowladda Federaalka ku gacansiiyay la tacaaladda xaaladaha bani aadamnimo ee Dalka soo maray iyo arrimo kale oo muhiim ah.
