Isniin 16,Dec,2024 {HMC} Xaafado kamid ah magaalada Muqdisho ayaa bilaabay in ay sameestaan ciidamo lagu sheegay madani, kaddib markii xaafadahaasi kusoo bateen falalka la xariira amni darada iyo dhibaatooyinka kale ay geestaan ciyaalka weerada loo yaqaan.
Maamulka degmada Dayniile ayaana bilaabay in dadka degan waaxyaha Ciise Cabdi iyo Barwaaqo ee deegaanka Gubta ku amraan in ay bixiyaan bishii lacag, si loo ilaaliyo amniga guryaha iyo dadka degan xaafadaha kuyaalla waaxyahaasi.
Sida aan xogta ku helnay guri kasta oo kuyaalla Gubta, ayaa lagu soo rogay bixinta lacag dhan 4 dollar bishii, gurigii aan bixin lacagtaasi ayaana lagu wargalinayaa in aan la damaanad qaadi doonin amnigiisa uuna halis ugu jiro in burcada beegsadaan.
Dadka degan xaafadaha lacagana sharcidarada ah lagu soo rogay qaarkood ayaa diiday bixinta lacagta, halka kuwa kalana ay bixiyeen, iyaga oo ka cabsi qaba in ay dhibaato kala kulmaan dhallinyarada lagu sheegay madaniga oo iyada naftooda suurto gal tahay in guryaha aan lacagta dhiibin beegsadaan.
Dayniile waxaa kuyaalla saldhig booliis, waxaana ka howlgalla ciidamo badan oo isugu jira booliis, nabbad sugid iyo booliisa milataari, waxaana dad badan isweediinayaan waxa ay qabanaan ciidanka madaniga ah, dadka qaar ayaana rumeysan in madaniga uu yahay qorshe la doonayo in lacag badan lagu aruursado.
