Jimco , 13, Dec, 2024 {HMC} – Madaxweyne Kuxigeenka Jubaland Maxamuud Sayid Aaden oo maalmahanba ku sugnaa magaala madaxda Itoobiya ee Addis Ababa ayaa kulan la qaatay taliyaha guud ee ciidamada Itoobiya Janaraal Birhanu Jula.
Janaraalka iyo Maxamuud Sayid Aadan ayaa ka wadahadlay arimo ay kamid yihiin amniga, dagaalka ka dhanka ah Al-Shabaab ee deegaannada Jubaland. Arimaha kale ee laga wadahadlay waxa kamid ah isu socodka xuduudda gobolka Gedo iyo Itoobiya, sida ay baahisay warbaahinta Jubaland.
Maxamuud Sayid Aadan ayaa todobaadkan bilowgiisii u safray Itoobiya, xili ay ka sii daraysay xiisadda u dhaxeysa dawladda federaalka iyo maamulka Jubaland. Dawladda federaalka ayaa sheegtay in Maxamuud Sayid Aadan ay garoonka Kismaayo ka qaaday diyaarad laga leeyahay Itoobiya oo markii hore hub sharci darro ah gaysay magaalada Kismaayo. Jubaland way beenisay in diyaaraddo hub sida ay cagadhigteen garoonka, laakiin waxa ay xaqiijiyeen in Maxamuud Sayid Aadan uu safar ugu baxay Addis Ababa.
Maxamuud Sayid Aadan ayaa muddo dheer xiriir dhaw la lahaa sarkiisha Itoobiya, isagoo kala shaqeynayay dhaqdhaqaaqa ciidamadooda jooga gobolka Gedo.
