Talaado 10, Dec 2024 {HMC} Xasan Sheekh Maxamuud Madaxweynaha Soomaaliya, ayaa u safray magaalada Ankara ee dalka Turkiga, si uu uga qayb-galo wareegga saddexaad ee wada-hadallada lagu qaboojinayo xiisadda kala dhexeysa Itoobiya, sida ay sheegtay wakaaladda Wararka Soomaaliyeed ee SONNA.
Haddii uu sidoo kale kulanka ka qeyb galo Ra’iisul Wasaaraha Wadanka Itoobiya Abiy Axmed, waxa ay noqoneysaa markii ugu horeysay oo ay kulmaan labada mas’uul tan iyo markii Addis Ababa ay ku dhawaaqday in ay deked ka dhisanayso qeybo kamid ah badda Soomaaliya oo ay heshiis kula gashay Soomaaliland.
“Madaxweyne Xasan Sheekh Maxamuud ayaa u ambabaxay magaalada Ankara, kaddib casuumaad rasmi ah oo uu ka helay Madaxweyne Recep Tayyip Erdogan, waxaa dib u furmaya wejigii saddexaad ee wada-hadallada Soomaaliya iyo Itoobiya oo uu gar-wadeen ka yahay Turkiga.” Sidaa waxaa qortay Wakaaladda Wararka Soomaaliyeed ee SONNA X.
dhinaca kale Saraakiisha Itoobiya iyo wasaaradda arrimaha dibadda Dalka Turkiga ayaa diiday inay ka hadlaan arrintan.
Wajiga saddexaad ee wadahadalada Soomaaliya iyo Itoobiya ayaa marar kala duwan dib u dhacay, sababa la xiriira xiisadda labada dal.
Soomaaliya ayaa Itoobiya maalmo ka hor ku eedeysay inay hub geysay magaalada Kismaayo, si ay usii huriso xiisadda dowladda Federaalka iyo maamulka Jubbaland.
Dowladda Ethiopia wax jawaab ah kama bixin eedeymahii loo soo jeediyay, inkastoo maamulka Jubbaland uu beeniyay warkaas.
