Talaado 10, DEC 2024 {HMC} Taangiyada Israa’iil ayaa 30 km u jira Dimishiq, xilli 300 oo weerar ay Israa’iil ka geysatay goob kasta oo saldhig iyo xarun amni ah oo ku yaalla gudaha Suuriya tan iyo markii mucaaradku la wareegeen talada dalkaas.
Israa’iil ayaa illaa ay xaqiijiso inay wada burbureen diyaaradaha iyo saldhigyada hubka ee Suuriya, waxay ku wadaa duqeynteeda joogtada ah.
Duqeymahan ayaa lagu sheegay taariikhdii kuwii ugu sarreeyay ee ay Israa’iil fulinayso.
Nidaamka cusub ee Suuriya ayaa wajahaya xaalad hubantii la’aan ah iyadoo sii socoshada weerarrada Israa’iil ay dhalin karta carada dagaalyahannada xukunka la wareegay ee ku jira is xakameyn sarreysa oo ay uga fogaanayaan xaalad dagaal oo ay dhexda u galaan, iyagoon illaa hadda wax hadal ah ka soo saarin weerarrada aan xadka lahayn ee Israa’iil oo sidoo kale taangiyadeeda keentay meel bartamaha Dimishiq u jirta kaliya 30 km.
Israa’iil waxay ka faa’iideysatay firaaqii dhacay muddadii uu socday kacdoonkii xukunka looga tuuray Assad, iyagoo la wareegay dhulka Suuriya ee buurta Hermon , halkaasoo ay ka dhigayaan aag xadduudeed hor leh.
Arrinta dhulka ay isku ballaarinayo Israa’iil, waa mid ka mid ah xaaladaha uga baahan si dhaqso leh inay go’aamo uga soo saaraan mucaaradka xukunka la wareegay.
Dhinaca kale, Hoggaamiyaha ciidanka la wareegay xukunka Suuriya ayaa soo saaray go’aan uu ku shaaciyay in caddaaladda la horkeeni doono, kuwii ka dambeeyay dilka, ciqaabta, xad-gudubyada iyo dhibaateynta bulshada Suuriya, meel kasta oo ay joogaan ayuu sheegay in looga dabatagi doono, wax kasta oo ay ku arkeen xabsiyada iyo guryaha dadka Suuriya kuwii geystay haddii ay cafiyaan, wuxuu sheegay inan iyaga cidna cafin doonin.
