Axad 8, Dec 2024 {HMC} Xasan Cabdi Ismaaciil Xasan Firinbi oo kamid ah mudanayaasha Baarlamaan Soomaaliya ayaa la dul dhigay ganaax adag oo gunno ka jaris ah iyo muddo laba bilood ah inuusan soo xaadiri karin fadhiyada Golaha Shacabka.
Warqad kasoo baxday xafiiska Guddoomiyaha Golaha Shacabka Sheekh Aadan Madoobe ayaa lagu sheegay in laba bilood oo xiriir ah laga joojiyay fadhiyadda Golaha Shacabka Xildhibaan Xasan Cabdi Ismaaciil oo fal gacan qaad ah 27-kii Bishii November u geystay Askari ka tirsan ilaalada xarunta Golaha Shacabka.
Xasan Firinbi ayaa sidoo kale la dul dhigay ganaaxyo isugu jira jeris gunno iyo ka joojin fadhiyada Golaha uu kala mideeysan yahay Xildhibaano lagu soo eedeeyay sida warqadda ku xusan is horistaagid Guntanka ama kooramka Golaha iyo ka hor imaansho Xeerhoosaadka Golaha Shacabka ay sameeyeen.
Aadan Madoobe Gudoomiyaha Baarlamaanka ayaa Xildhibaanadda Golaha Shacabka ku bogaadiyay howlaha ay Qaranka u hayaan isaga oo kula dardaarmay ilaalinta iyo dhowrista nidaamka iyo sidoo kale habsami u socodka Golaha.
Kulan ka dhacay Guriga uu Magaalada Muqdisho uu ka degan yahay Gudoomiye Aadan Madoobe ayaa lagu soo dhoweeyay Xildhibaan Xasan Yare raaligelintii iyo cudur daarkii uu ka bixiyay falkii gacan qaadka ahaa ee Golaha Shacabka uu ka sameeyay 27kii Bishii hore.
