Madaxweynaha la doortay ee Mareykanka Donald Trump ayaa sheegay in Washington aysan ku lug yeelan dib u soo celinta dagaalka sokeeye ee Suuriya, sida uu ku qoray bartiisa bulshada ee Truth.
Trump ayaa sheegay in mucaaradku ay awoodeen in ay gaaraan guulihii ugu dambeeyay sameeyaan maadaama Ruushka uu ka baxay garabkiisa dagaalka Ukraine awgii uuna joojiyay taageerida Suuriya, oo ah waddan ay ilaalinayeen sannado badan.
Dhinaca kale, Shabakadda Bloomberg, ayaa soo bandhigtay iskudayga u dambeeyay ee uu sameeyay Bashar Al-assad si uu u helo awood ka hortagi karta mucaaradka, wuxuuna Imaaraadka Carabta ka codsaday inay dhisaan xiriir uu la yeelanayo madaxweynaha la doortay ee Mareykanka Donald Trump, isagoo u gudbiyay farriin uu kaga codsanayo in laga caawiyo joojinta mucaaradka ka hor inta aysan gelin Dimishiq — beddelkeeda wuxuu Assad ballanqaaday inuu jarayo dhammaan xiriirka Iran iyo ururka Xisbullah, isagoo iskaashi la yeelanaya reer galbeedka.
Intaa kuma joogsan, wuxuu Assad u diray dalka Hungary wadaad masiixi ah si uu uga dhaadhiciyo Ra’iisul wasaaraha Hungray, Viktor Orbán oo ka mid ah saaxiibbada ugu dhow ee Trump inuu la hadlo Trump oo uu u sheego haddii mucaaradku qabsado Suuriya in nolosha Masiixiyiinta laga tirada badan yahay ay khatar geli doonto
Hase ahaatee Trump ayaan dheg jalaq i siin arrintaas wuxuuna a baahiyay qoraal uu ku ammaanay howlgalka mucaaradka oo uu sheegay inuu yahay mid cajiib ah oo si wanaagsan loo agaasimay, wuxuu ku maadeystay Ruushka oo uu ku tilmaamay mid aan awood u lahayn inuu celiyo mucaaradka, wuxuuna qoraalka ku soo gabagabeeyay “ Assad saaxibkeen ma aha, dagaalkunna ma aha dagaalkeenna.”
