Khamiis 05, Dec 2024 {HMC} Kooxo burcad hubeysan ayaa goordhaw deegaan lagu magacaabo Gugulethu oo katirsan magaalada Cape Town ee dalka Koonfur Afrika, waxa ay ku dileen muwaadin Soomaaliyeed oo ku sugnaa dukaan ganacsi uu ka shaqeenayay.
Sida aan wararka ku helnay burcada hubeysan ayaa dhoor xabadood ku dhuftay kuna dilay goobtaasi marxuum Maxamed Cali Culusoow oo ahaa nin dhallinyaro ah, waxa ayna burcada dukaanka horey uga sii qaateen lacago iyo agabyo kale.
Ciidamo katirsan booliiska dalka Koonfur Afrika ayaa gaaray goobta uu dilku ka dhacay, waxa ayna ciidamada sheegeen in ay baarayaan kiiskan dilka ah ayna gacanta kusoo dhigi doonaan burcadii ka dambeesay dilka muwaadinkan Soomaaliyeed.
Dalka Koonfur Afrika ayaa si joogto ah loogu dilaa muwaadiniinta Soomaaliyeed ee halkaasi ka shaqeesta, waxaana dalkaasi lagu dilay boqolaal qof oo Soomaali ah, mana jirto cid iska warsatay dilka iyo dhibaatooyinka dalkaasi loogu geesto muwaadiniinta Soomaaliyeed.
