Talaado 3, Dec 2024 {HMC} Cali Cumar Cali Balcad Wasiiru Dowlaha Wasaaradda Arrimaha Dibadda ee Xukuumadda Soomaaliya oo shir jaraa’id ah ku qabtay magaalada Muqdisho ayaa faah faahin ka bixiyay halka ay mareeyso xaalada Caafimaad in kabadan 70 Qof oo muwadiniin Soomaaliya ay laba doonyood ay wateen ay ku degtay xeebaha Jaziirada Madagascar.
Wasiir Balcad waxa uu tilmaamay in laba sarkaal oo ka kala tirsan Wasaaradda Arrimaha Dibadda iyo Wasaaradda Cadaalada ay u direen Madagascar si loosoo celiyo muwaadiniintii doonidaasi ka badbaaday iyo la socodka xaaladoodi Caafimaad.
Wasiirka ayaa uga mahadceliyay Dowladda iyo Shacabka Madagascar gaar ahaan Kalluumaysatadii gacanta weyn ka geestay inay soo samatabixiyaan kuwa badbaaday oo hadda ku jir Xarun Jiimka lagu ciyaaro oo ku taala Jaziiradaasi, wasiirka waxa uu xusay in goobta ay kuwa lasoo badbaadiyay hadda ay ku jiraan ay aad ukulushahay balse dhowaan dalkoodi lagu soo celin doono.
Kalluumeysatada ka jilaabata Jasiiradda Nosy Iranja, ayaa soo badbaadiyay 47 Muwaadiniin Soomaaliyeed oo doonadii ay saarnaayeen xeebta kula qalibmatay 23-kii November, 2024, Dhacdadan ayaa galaaftay nolosha dad badan oo tiradoodu dhan tahay 28 qof, iyadoo 23 lagu aasay Qabuuraha badda, halka 5 qofna lagu aasay Madagascar.
Baaritaanka horu dhaca ay Dowladda sameeysay waxaa ku cad in tahriibayaasha uu Socdaalkoodi ka bilowday magaalada Muqdisho ee Caasimadda Soomaaliya, iyadoo kooxdan ay sii mareen magaalada Nairobi ee dalka Kenya, iyagoo ku sii jeeday magaalada Mombasa, halkaasoo ay ka raaceen doomo si lama filaan ah ugu dagtay meel u dhow Madagascar.
Dowladda Federaalka Soomaaliya ayaa wufuud heer sare ah u dirtay Madagascar si ay u kormeeraan xaaladda una xaqiijiyaan in kuwa badbaaday ay si nabad ah ku soo laabteen.
Dr. Xasan Sheekh Maxamuud Madaxweynaha Dowladda Federaalka Soomaaliya ayaa tacsi tiiraanyo leh u diray ehelada marxuumka, wuxuuna caddeeyay in dowladdu ay ka go’an tahay ka hortagga musiibooyinka noocan oo kale ah.
