Axad 01, Dec 2024 {HMC} Madaxda Dalalka Uganda & Kenya ayaa wada dedaal xooggan oo ay ku doonayaan in ay ku dhexdhexaadiyaan Dowladaha Soomaaliya iyo Itoobiya oo xiriirkoodu xumaaday isla markaana gaaray heerkii ugu hooseeyay, waxaa intaas usii dheereed hadallada adag ay is dhaafsadeen.
Itoobiya ayaa billowgii sanadkaan dhammaadka ah waxa ay sheegtay in Maamulka Somaliland ee Gobollada Waqooyi Jamhuuriyadda Federaalka Soomaaliya la gashay heshiis kahor imaana madaxbannaanida, wadajirka & xeerarka kale ee Caalamiga ah.
Soomaaliya ayaa tallaabadaas uga jawaabtay in ay hoos u dhigto cilaaqaadkii kala dhaxeeyay Itoobiya, waxaa intaas dheer in khilaafkooda uu gaaray heer Xukuumadda Muqdisho ay dhiggeeda Addis Ababa ka saarto Dalalka xubnaha ka noqonaya howlgalka AUSSOM.
Turkiga ayaa saddex jeer qaaday tallaabooyin uu ku dhexdhexaadinayo labadaan Dal balse wax natiijo ah kama gaarin, labadii wareeg ee ugu horreeyay wadahadallada oo ahaa mid aan si toos ah u qabsoomin waxaa laga gudbi waayay shuruudaha Soomaaliya iyo Itoobiya.
Wareeggii 3aad ee wadahadalka Turkiga wuu baaqday kolkii shuruuduhu cuslaadaan iyada oo Addis Ababa ay qaadday tallaabooyin cusub oo xaaladda ka dhigay mid sii cakirtay, Turkiga oo aan is dhiibin ayaa wadahadalkaas si kale u dhigay oo si dadban dhinacyadaan ula hadlay.
Wadahadallada Turkiga oo hakad ku jira waxaa ku dul billowday mid kale oo ay dhexdhexaadintiisu gaar u tahay Dowladaha Kenya iyo Uganda, madaxweynaha Soomaaliya Xasan Sheekh Maxamuud waxa uu shalay sheegay in aanay isbaddelin Mowqifkeeda la xiriira in Itoobiya ay sheegto in ay burburisay is afgaradkii ay la gashay Maamulka Somaliland.
Hoggaamiyihii Maamulka Somaliland ee is afgaradkaan la galay Itoobiya waa Muuse Biixi Cabdi oo looga adkaaday doorashadii dhacday Nofeembar ayaa looga adkaaday, halka Madaxweynaha cusub ilaa haatan uusan ka hadlin mowqifkiisa arrintaas la xiriira.
Safiirka Soomaaliya Tanzania Ilyaas Cali Xasan ayaa qoraal uu soo dhigay bartiisa Facebook waxa uu ku beeniyay Magaalada Caruusha ay ku kulmayaan Madaxweynaha Soomaaliya iyo Ra’iisul Wasaaraha Itoobiya Abiy Ahmed.
Su’aalaha laga iska weydiinayo wadahadalkaan cusub ayaa kala ah:
Ma jiraa isbaddel cusub oo horseedi kara in uu furmo albaabka wadahadalka?
Wadahadalkaan muxuu kaga duwan yahay kuwii ka horreeyay ee Turkiga ka dhacay?
Haddii Soomaaliya ay ku dheggen tahay go’aankeeda, ma dhanka Itoobiya ayuu ka imaan karaa isbaddel cusub oo dhalin kara in wadahadal uu dhaco?
Turkiga oo ah Dal si dhow xiriir wanaagsan kala dhaxeeya Soomaaliya iyo Itoobiya xalka uu dhalin waayay miyay keeni karaan Kenya & Uganda?
