Isniin 25 November-2024 {HMC} Xildhibaan Cabdiraxmaan Cabdishakuur Warsame ayaa hambalyo u diray Madaxweynaha Jubbaland, Axmed Axmed Madoobe, oo maanta markii saddexaad loo doortay hoggaamiyaha Jubbaland.
Xildhibaan Cabdiraxmaan Cabdishakuur ayaa sheegay doorashada Axmed Madoobe in ay si rasmi ah u soo afjartay rajadii muddo-kororsiga ee Villa Soomaaliya,” taas oo uu ku tilmaamay inay ku hoos duugneyd muddo-kordhinta hoggaamiyeyaasha dowlad-goboleedyada.
Cabdiraxmaan Cabdishakuur ayaa uga digay madaxda dowladda federaalka in ciidanka xoogga dalka loo adeegsado dano siyaasadeed, isagoo tilmaamay in ficillada noocaas ahi ay halis ku yihiin xasiloonida iyo wadajirka dalka.
“Waxaan Madaxda Dowladda Federaalka ah kaga digaynaa in ay Ciidanka Xoogga Dalka (CXD) u adeegsadaan dano siyaasadeed, waxaan xusuusinaynaa in ay waali tahay ku celcelinta ficillo isku mid ah iyadoo la filayo natiijo hor leh,” ayuu yiri Cabdiraxmaan Cabdishakuur.
Xildhibaanka ayaa ugu baaqay Madaxweyne Xasan Sheekh Maxamuud, in muddada xilkiisa uga harsan inuu xoogga saaro midnimada iyo wadajirka dalka. Sidoo kale, wuxuu ku boorriyay in la gaaro hannaan doorasho oo heshiis lagu yahay, laguna qabto xilligii loogu talagalay, amnigana la xaqiijiyo.
Si kastaba ahaatee, badi siyaasiyiinta kasoo horjeeda dowladda Soomaaliya iyo madaxweynaha maamulka Puntland Saciid Deni ayaa soo dhoweeyay dib u doorashada madaxweyne Axmed Madoobe.
