Axad Nov 24, 2024 {HMC} Xubnaha Komiishanka Doorashooyinka qaranka ayaa maanta booqasho iyo salaan ugu tegay Madaxweynaha la doortey ee Somaliland Cabdiraxmaan Maxamed Cabdilaahi Cirro.
Xubnaha guddida doorashooyinka qaranka oo uu hogaaminayay Guddoomiyaha Komishanka Doorashooyinka Qaranka Muuse Xasan Yuusuf ayaa waxay labada dhinac iska xog waraysteen shaqadii cusleyd ee doorashooyinkii Madaxtinimo ee dhawaan dalka ka qabsoomay oo u dhacay si daah furan oo xor iyo xalaal ah.
Xubnaha Komiishanka Doorashooyinka Qaranku waxay Madaxweynaha la doortay eebbe uga baryeen inuu ku asturo isaga iyo ku xigeenkiisa Mas’uuliyada culus ee ummadu codkooda ku siisay.
Madaxweynaha cusub ee la doortay Cabdiraxmaan Maxamed Cabdillaahi Cirro ayaa Komiishanka Doorashooyinka ku aamanay inay dalka ka hir geliyeen doorashooyin sumcada Somaliland kor u qaaday.
Madaxweynaha la doortay waxaa kale oo kulankaas ku wehelinayey labada Sarkaal ee Xisbiga Waddani u qaabilsan la shaqaynta Komiishanka Doorashooyinka Qaranka oo kala ah Xoghayaha guud ee xisbiga Waddani Khadar Xuseen iyo Siyaasi Ismaaciil Aadan Cismaan.
