Sabti 16- Nov-2024 {HMC} Xildhibaannada iyo Wasiirrada kasoo jeeda Maamulka Somaliland Gobollada Waqooyi Jamhuuriyadda Federaalka Soomaaliya ayaa sheegay in kulan duco ah ay Magaalada Muqdisho ugu sameynayaan Madaxweynihii hore ee Maamulkaas Axmed Maxamed Maxamuud Siilaanyo oo xalay ku geeriyooday Magaalada Hargeysa.
Xubnahaan oo si wadajir ah ula hadlay Warbaahinta ayaa sheegay in Marxuum Siilaanyo keliya uusan ka geeriyoon Gobollada Waqooyi balse guud ahaan uu ka shaqeynayay sidii loo horumarin lahaa Ummadda Soomaaliyeed.
Wasiirka Wasaaradda Beeraha iyo Waraabka JFS Maxamed Cabdi Xayir Maareeye ayaa madashaan ka sheegay in kulankaan ay ugu duceyn doonnaan Marxuum Axmed Maxamed Maxamuud Siilaanyo oo waxqabad muuqda ka tagay.
“Maanta halkaan anaga oo ah Xildhibaannada & Wasiirrada Dowladda Federaalka waxa aan ka tacsiyeyneynaa geerida ku timid Madaxweynihii sida dimuqraadiga ah loo doortay ee Axmed Maxamed Maxamuud Siilaanyo, kulan Baroordiiq ah ayaan Muqdisho ugu sameyn doonnaa” Wasiir Maareeye.
“Waxa uu soo noqday Wasiirkii Qorsheynta oo hageysay dhammaan wixii horumar Dalkaan laga sameeyay, aqoonyahan weyn ahaa oo cimrigiisa oo dhan ummadda Soomaaliyeed usoo shaqeeyay, qofka marka uu dhinto Dadka oo dhan uma wada tago balse meesha uu joogo ayuu uga duceeyaa” Ayuu hadalkiisa sii raaciyay Wasiir Maxamed Cabdi Xayir Maareeye.
