Khamiis 14,Nov 2024 {HMC} Ciidamada ATMIS ayaa si rasmi ah ugu wareejisay Ciidamada Xoogga dalka Soomaaliyeed Saldhigii hore ee Ciidanka Xoogga dalka ee degmada Buurgaabo.
Taliyaha ciidamada ATMIS Injineer, Col. Suleymaan Ibraahim ayaa u xaqiijiyey taageeradooda iyo sida ay diyaarka ugu yihiin marka ay la wareegayaan mas’uuliyadda amniga.
Wuxuu ku ammaanay qeybta labaad ee ATMIS ee ka socda ciidamada Kenya sida nafhurnimada iyo iskaashiga ay la leeyihiin ciidanka xoogga dalka si loo xaqiijiyo nabadda & xasilloonida Jubaland.
Guddoomiyaha degmada Badhaadhe, Gen. Maxamed Ibraahim Faarax, ayaa bogaadiyay sida ay uga go’an tahay ciidanka Kenya inay xasiliso gobolka, wuxuuna ku dhiirigeliyay xoogga dalka inay sii xoojiyaan guulahaas.
Xafladda ayaa waxaa goob joog ka ahaa Taliye ku xigeenka ATMIS Sector Two Col. Meshack Kishoyian, Taliyaha FOB ee xilka ka degaya Maj. Charles Kaara, Taliyaha FOB ee xilka la wareegaya Maj. Muktar Mohamed, iyo wakiilo ka socday ATMIS, XDS & UNSOS.
