Axad 10- Nov-2024 {HMC} Xildhibaannada golaha Wakiiladda ee dowlad goboleedka Jubbaland , ayaa goordhaw meel mariyay guddiga doorashada iyo xuduudaha Jubbaland uu xalay wareegto ku magacaabay Madaxweynaha maamulkaasi Axmed Maxamed Islaam (Madoobe).
Kulanka xildhibaannada Jubbaland oo ay soo xaadireen 66 xildhibaan ayaa si aqlabiyad leh waxa ay u meel mariyeen guddiga doorashooyinka iyo xuduudaha Jubbaland, kuwaa oo ka shaqeenaya hirgalinta doorashooyinka Baarlamaanka iyo Madaxweynaha Jubbaland.
Guddoomiyaha Golaha Wakiiladda Jubbaland Cabdi Maxamed Cabdiraxmaan, ayaa shaaciyay in ansax yihiin guddiga doorashooyinka iyo xuduudaha, waxa uuna sheegay in hadda kaddib ay guda gali karaan howlihii loo igmaday ee ah hirgalinta doorashooyinka Jubbaland.
Madaxweyne Axmed Madoowe ayaa xalay magacaabay 7-xubnood oo ah guddiga doorashooyinka iyo xuduudaha Jubbaland, guddigan ayaana ka shaqeenaya doorashada Jubbaland oo mar male la filayo in uu kusoo baxo Axmed Madoobe.
Dowladda Federaalka Soomaaliya ayaa dhankeeda kasoo horjeesatay guddiga uu magacaabay Axmed Madoobe, waxa ayna dowladda uga digtay hoggaamiyaha Jubbaland in uu qabto doorasho aysan dowladda raali ka aheyn oo abuuri kara xiisad siyaasadeed.
