Talaado, 5,Nov 2024 {HMC} Wasiirka Maaliyadda Xukuumadda Federaalka Soomaaliya, Biixi Iimaan Cige, ayaa si rasmi ah u shaaciyay in Dowladda Mareykanka ay cafisay qeyb weyn oo ka mid ah deyntii ay ku lahayd Soomaaliya.
Wasiirka ayaa sheegay in dhammaan shuruudihii dayn-cafinta ee lagu heshiiyay si rasmi ah loo buuxiyay, iyadoo dowladda Mareykanka ay noqotay midda ugu badan ee deynta ku leh Soomaaliya. Biixi Iimaan Cige ayaa ku ku dhawaaqay in dowladda Mareykanka ay cafisay lacag gaaraysa $1.14 bilyan oo doolar, taasoo qeyb ka ah dadaallada dowladda Soomaaliya ee ku aaddan dib-u-habeynta dhaqaalaha.
Wasiirka Maaliyadda ayaa sheegay in deyn-cafintu ay ka dhigan tahay fursad weyn oo Soomaaliya in ay dib u dhisto dhaqaala.
“Waxaa maanta soo dhameystirmay shuruudihii dayn cafinta ee na loogu masaxi lahaa buugga, dowlado badan ayaa nagu lahaa dayn, Dowladda Mareykanka oo ah tan ugu badan ee deynta nagu leh ayaa naga cafisay lacag gaareysa 1.14 bilyan.” Ayuu yiri, Wasiirka Maaliyadda XFS Biixi Iimaan Cige.
Munaasabadda lagu soo bandhigayay in deyn-cafinta ay Soomaaliya ka heshay Dowladda Mareykanka ayaa waxaa ka qayb-galay Safiirka Mareykanka ee Soomaaliya, iyo mas’uuliyiin kale oo sare, kuwaas oo dhammaantood ka muujiyay sida ay u taageersan yihiin horumarka Soomaaliya iyo dadaallada ay ku wajahday xalinta dhibaatooyinka dhaqaale.
