Khamiis 22, August 2024 {HMC} Cristiano Ronaldo, xiddiga kubadda cagta caalamiga ah ee dalka Portugal, ayaa si rasmi ah u daah furay kanaalkiisa YouTube-ka oo loogu magac daray “UR Cristiano.” Daahfurka ayaa noqday mid mucjiso ah, iyadoo malaayiin qof ay iska diiwaan geliyeen saacado gudahood, kuwaasoo si toos ah ugu biiray dadka taageera halyeyga kubadda cagta reer Portugal CR7.
Ronaldo ayaa kanaalka “UR Cristiano” ku soo bandhigay 19 muuqaal oo gaar ah, kuwaasoo badankoodu ka hadlayaan noloshiisa gaarka ah iyo tan qoyskiisa. Waxay ahayd arrin la yaab leh in 16.9 milyan oo qof ay kusoo biiraan kanaalka 17 saacadood gudaheed. Tani waxay keentay in saxaafadda caalamka ay si weyn u hadal heyso mucjisada uu Ronaldo ka sameeyay mareegta YouTube-ka.
Mucjisadaas ayaa noqotay mid ay dadku si weyn uga hadlayaan, gaar ahaan marka la eego isbarbardhiga loo sameeyay Ronaldo iyo xiddiga kale ee caanka ah ee Lionel Messi.
Waxaa si weyn loogu maadsaday Messi, kaasi oo ah ciyaaryahan weyn oo la xifaaltama Ronaldo, waxaana ay ku qaadatay 18 sano inuu gaaro 2.3 milyan oo taageerayaal ah, halka Ronaldo uu ku gaaray hal saac gudaheed. Tani waxay mar kale adkeysay kaalinta uu Ronaldo ku leeyahay dunida ciyaaraha iyo baraha bulshada.
Cristiano Ronaldo, oo aan ku koobneyn kubadda cagta kaliya, ayaa ah hantiile haysta hoteello, jaziirado gaar ah, maraakiib iyo diyaaradahooda gaarka ah. Ku biiristiisa
YouTube-ka waxay u muuqataa inay qeyb ka tahay qorshihiisa ballaaran ee uu ku horumarinaayo magaca iyo sumcaddiisa dunida digitalka.
Ronaldo ma aha kaliya ciyaaryahan, balse sidoo kale waa shakhsi caanka ah oo ah kan ugu taageeraha badan mareegta Instagram, halkaas oo uu ku leeyahay in ka badan 600 milyan oo raacayaal ah (Followers). Waxaa la rumeysan yahay in adeegsiga baraha bulshada ee noocan oo kale ah ay qeyb weyn ka yihiin ilaha dhaqaalaha ee Ronaldo, iyadoo shirkado waaweyn ay malaayiin doolar ku bixiyaan in uu ka furto kanaallo ama akoonnada baraha bulshada, maadaama uu leeyahay taageereyaal aad u fara badan oo dunida daafaheeda ku nool.
Ronaldo ayaa hadda u muuqda astaan caalami ah oo isbeddelka cusub ee teknoolojiyadda la jaanqaaday, waxaana uu muujiyay inuu yahay hoggaamiye ka dhisan dhinac walba, haddii ay tahay ciyaaraha, ganacsiga ama baraha bulshada. Waxaana la filayaa in kanaalka “UR Cristiano” uu noqdo mid ka mid ah kuwa ugu caansan YouTube-ka, isagoo taageereyaashiisa u sahlaya inay la socdaan noloshiisa gaarka ah iyo hawlihiisa kala duwan.
